列印

酒よ13

本主題由 恆愛台 於 2016-11-4 09:13 PM 設置高亮
您是本文第300個瀏覽者

酒よ13

袂少人討厭食酒人。原因真濟:

食酒的時大細聲,是其中一點。本成,一群人做伙食酒,無大聲,聽袂清楚,甚至無聽見;閣老實講,食酒無大聲,敢有成(sing)食酒?因為酒醉的感覺是食酒人追求的,一產生酒醉的感覺,音量當然會控制較袂牢啊;何況講,若有拚酒拳的時,聲震天篷(thian-pông),是偌仔呢爽快的代誌,非酒中人真才是歹體會。毋過,吵著人就毋著,顧人怨嘛應該。

第二,食酒人講食酒話,翻來翻過去,較翻嘛彼幾句,較翻嘛彼幾件代誌,使人厭siān。朋友鬥陣話仙,我是一个袂愛重複的人,所以食酒人翻話,我嘛袂堪得。只不過詳細觀察紅塵社會,人際往來好親像無啥物新鮮事,親像和尚念經,拍球人講規年迵天(kui-nî-thàng-thinn)的球經,股市老手一見面講透暝的股經,所以食酒人翻話嘛真正常啊。毋管啥人,除了願意學習、改變以外,數想毋重複話談,攏是無可能的代誌。

第三,食酒人長尻川,gâu話gâu牽,中晝食飯,有才調牽甲三更半暝,甚至天光,猶咧食猶咧話,想袂歇睏閣硬陪的人,當然無歡喜。會記得有一改,阮朋友6-7人揣我,我參其中一个K黨的死硬派,一直啉一直諍,按黃昏諍到隔轉工中晝頓----------這種情景,啥人擋會牢?尤其愛紲攤的食酒人,理所當然予牽手翻白目款待啊。

第四,食酒人講食酒話,予人有無信用的感覺;食酒人愛展粗展勇展風神,gâu參人冤家、惹事;特別是食酒了騎車、駛車肇事,害受傷害的人抑是家屬,怨嘆一世人。我印象真深的,有一改參人食酒,有一个江湖人為小代誌雄雄受氣提銃出來講,「毋捌看過鐵呢?」真是活欲驚死人!

話按呢講,文按呢寫,嘛猶有人倒反想倒反行,認為酒大喙大喙共食落,變成好朋友,生理就走袂去矣。

啉酒才辦有代誌、做有生理,這可能嘛是啉酒的人,佇社會上保持一定比例人數的重要原因之一。

[ 本文章最後由 巫火爐 於 2016-11-4 08:36 PM 編輯 ]

TOP