列印

酒よ11

本主題由 恆愛台 於 2016-10-16 10:27 AM 設置高亮
您是本文第362個瀏覽者

酒よ11

對我來講,我認為啉酒喝拳,是足趣味的代誌。

做兵以前,我毋捌啉酒,當然毋捌喝拳,好親像嘛毋捌看人喝過拳,這可能和我蹛庄跤,庄跤人攏較樸實有真大的關係。

做兵的時,開始喝拳。ぱらげん是日本拳,出單手,出兩枝指頭仔叫做ちょう,出網仔叫做ぱ,出拳頭叫做ぐっ。無仝的,像對手出ちょう-ぐっ,你也喝ちょう-ぐっ,你就贏拳,對手就愛輸酒;如果挽,就是拳出相款,像對手攏出ぱ-ぱ-ぱ,你也喝ぱぱぱ,你就贏拳,對手就愛啉輸酒。毋過,這種拳,毋知是我頭殼䆀,抑是反應慢,我喝著喘phenn-phenn,袂適應,輸較濟贏。

另外一種そろげん,嘛是日本拳,二个人四肢手做伙出,干也會使出0-5-10,算二人的總數,毋是總無出らっし,就是ご-じゅう-じゅうご,上大にじゅう,相款無仝的,著二聲算贏拳,輸的啉;挽,就愛連贏三改。這種拳節奏據在喝的人,足慢足緊攏會使,我較適應較佮意。

第三種是台灣拳。台灣拳有三種耍法:拄著、各一和搶三。兩人攏出一隻手,同齊出聲,算總數,0是毋,1是單,2是兩,3是sam仔sam,4是四紅,5音相款,抑是喝文言音ngóo,6是6連,7是七巧,8是八仙,9喝狡怪,10喝總來、總出。二人同齊出聲,看啥人喝著加起來的數字。拄著是只要贏一遍,對手輸就啉;各一是贏一拳無算贏,先贏二拳才算贏;搶三是一定愛贏三拳才算贏。gâu喝拳的人,愛搶三的,上無嘛各一的,啊若我是較愛拄著的。

比較喝拳,民族性會當對遮看出來,日本拳輪流出聲喝拳,連贏,挽愛連三贏,才算贏。因為輪流出聲,所以日本人講究順序,是你的機會,我就惦惦;台灣拳同齊出聲,愛聽清楚家己和對手喝的數字,閣愛和(hô)總數,較鬧熱,嘛較吵,所以台灣人比日本人較gâu相諍相爭,爭無輸贏,較袂讓人。

愛喝拳勝過愛酒的人,上愛講的一句話是賭拳無睹酒;愛啉酒的人倒反,毋管啥物酒,杯仔倒較滇(tīnn)咧,灌予對方醉加足爽。

毋知是年紀的關係,抑是時代無仝矣,感覺酒場、宴會場,喝拳的人愈來愈少,人和人之間的關係蓋成嘛愈來愈稀微。

[ 本文章最後由 巫火爐 於 2016-10-16 07:03 AM 編輯 ]

TOP