列印

酒よ14

本主題由 恆愛台 於 2017-3-3 10:47 AM 設置高亮
您是本文第224個瀏覽者

酒よ14

佇咱的政府猶足有錢的時陣,為消化預算,辦啥物研習啥物座談的活動真濟。有一遍,佇一个出名的風景區所辦、一禮拜的愛國自強座談會裡,有一个國小的主任,拄放榜拄考過校長的國小主任,當是
「昔日齷齪不足夸,今朝放蕩思無涯。
春風得意馬蹄疾,一日看盡長安花。」

一群平平是老師的人,將伊圍牢咧,聽伊雞胿、臭屁伊拄考過校長的事實。伊講:
「對我來講,考校長無啥!人準備考校長,袂食袂睏,我考校長是照常逐工啉酒。每工下班開始參朋友啉酒,啉甲三更暝半才轉去厝,跤手面身軀洗洗咧,冊提出來,開始讀,讀甲天光,早頓食食咧,去學校開晨會上班、批看公文、做寡仔代誌。目一下nih,食晝、睏晝,睏甲下晡下班時間,閣離開學校去揣朋友啉燒酒。按呢,足足一個月的時間爾爾,冊讀好勢、試準備好勢,上戰場一考,就考全縣第一名,連阮某,彼个參我同齊考校長的某,伊認真做主任,攏無讀冊,干焦讀我模擬試題所寫的答案,我逐工上無寫一條題目,伊就讀一條。結果,我考牢,伊嘛考牢;我考第一名,伊考上尾名,第一名、上尾名攏相款,攏是校長,無差啦,考牢上好。恁看,考校長真正無啥,酒よ,我照啉照………」

在場聽伊雞胿、臭屁的同業公會的會員,個個露出欣羨、毋知欲按怎形容家己的回響的表情。

這个翁仔某後來攏做校長的主任,將啉酒,將酒よ,發揮甲上懸的境界。這个我親目看著的代誌,予我想起唐朝李白。有一工,賀知章叫李白寫詩,李白講酒よ猶啉無夠咧,欲哪吐有詩?賀知章知知咧,馬上閣叫人扶甕仔酒來。李白無客氣,橫啉強啉,啉甲馬西仔馬西,才講我有才調寫詩矣。筆一提起來,連吐幾仔首,予在場的人大開眼界。

李白佇一班人面頭前,是這種表現,連佇皇帝玄宗面頭前,伊嘛是這種表現,足出名的清平調,就是醉甲毋知人的時陣寫出來的。

朋友,酒よ,你是無啉才做有代誌?抑是啉才做有代誌?或者是大啉,啉甲像李白相款茫酥酥,頭殼的天門就拍開,就會當直接參天神溝通,發揮神彼一款的能力的人呢?

[ 本文章最後由 巫火爐 於 2016-11-28 07:43 AM 編輯 ]

TOP