列印

閒閒罔破豆

本主題由 恆愛台 於 2017-3-3 10:48 AM 設置高亮
您是本文第871個瀏覽者

閒閒罔破豆


講道理,講予家己聽,上好。
若講予對方聽,道理就會變做一支刀,人接起來用,講道理的人成功;毋過多數,對方會驚走去,抑是佇道理面頭前,甘願接受一刀,嘛無欲褫開目睭,試看道理一支刀好用亦歹用。
2016.12.12

一个青少年無追求的目標,這个青少年的人生一定會茫茫渺渺。
青少年心內愛有拍算,掃好塗跤、準備好一改的考試、計劃好步輾抑是跤踏車仔環島的行程種種,累積這類的小成就,才有機會變成一个成熟的大人。
假使青少年感覺家己,或者是家己的家庭輸人忝忝,想欲改變,佇這種刺激催捒之下,這種青少年上蓋有機會出頭天。
2016.12.10

人生無目的!
生落來,毋是你家己決定的;漸漸大漢,知影拍算,當等一把年紀,翻頭一看,所達成的,嘛攏無是青春少年夢的時所拍算的。
所以,我誠愛講人生無目的、教育無目的,秉良心,盡心盡力就是。                      2016.12.10


做你家己真重要。毋過,出世佇古井內的水雞,過著洋洋得意的人生,嘛會引起人愛笑。所以,無欲拍敗別人來參人比併,來了解這个世界,了解家己佇這个世界中所徛的位置,嘛是真重要。
2016.11.30

真濟事實證明,發生代誌瞬間的彼个念頭,唱聲講「無代誌」,參哀講「我死矣」,決定你的運命抑是生死。所以,常往好想,常講無代誌,會當予你避開災厄。                                     2016.11.25

道理毋用、無用、無才調用,參擺佇博物館的骨董,無啥物無仝。                  2016.11.24


「活動,活動,欲活就愛動。」一个參加家政班、聽講師講這句話了、閣記牢牢的70歲庄跤查某,逐工緊洗衫、煮飯、拭窗仔門、掃門口埕的時,緊喙唸這句話,連看電視,伊嘛徛咧蟯蟯旋、動無停,結果,成百歲參伊仝沿的人攏轉去矣,伊猶會騎跤踏車仔。無錯啊,實踐知識就會產生力量!
                                                                                                                                       2016.11.24
面對學生,老師的道理往往是錯誤的,學識往往是不足的;面對患者,醫生的醫術嘛往往是錯誤的,學識嘛往往是不足的。拍開智慧之門,只有謙虛面對學生、患者,甚至向學生、患者學習,才較有機會減少錯誤,邁向進步。
2016.11.20

人,無完人。佇這个前提之下交朋友,朋友的缺失就愛小吞忍一下;走揣對象,對象的缺失,你有才調忍受無?抑是對象本身,是按怎面對家己的缺失?有可能改無?這攏是你愛考慮的。2016.11.15

寫文章公開發表,參褪腹裼(thǹg-pak-theh)、無穿衫仔褲四界行,無啥物無仝。      2016.11.15

無成熟的人,抑是無夠成熟的人,做出錯誤的決定抑是失敗的時,頭殼馬上捽(sut)過攏是某乜人牽成的。這種想法,一直停留佇囡仔時代予石頭觸倒,老母拍、罵石頭予囡仔看相款。   2011.11.12

一个人和二个人的生活,差天較(kah)地。家己一个人,無人話仙,無人相楗(king),無人監督,環境較亂一下,無要緊;橫直一个人爾,後頓才較豐沛咧就好,拖咧沙咧,時間一久,狼狽款就浮出來矣。無論如何,陰陽愛調和,男女愛結婚,才符合自然。                                   2016.11.10戌時


除了無同意我意見的人,攏是好朋友,和除了同意我意見的人,攏是敵人。這兩種無仝的看法,你若採取後爿來思維,你就會常講:連結婚紀念日你都無重視,可見你無愛我—可見你後悔這段婚姻一一這號話像兩面刀,深深傷別人嘛傷家己。反過來,阮翁除了啥物生日、結婚紀念日這種小代誌無重視以外,伊是一个點燈仔火無咧揣的好翁婿,你若常按呢想,保證你會過著幸福快樂的婚姻生活。                                                                                                                            2016.11.9寅中

講話的人,講伊想欲講的;聽話的人,嘛聽伊想欲聽的。因此,聽講之間就差欲10萬8000里遠囉。有一改我講:尿一屑仔閣攝(liap)袂牢的人,你若開始量你每一改的尿量,你的泌尿系統的每一粒細胞,就會恢復功能來多謝你的關心。話真清楚。結果聽的人,隔一段真長的時間,嘛猶有才調真清楚回應予你:查甫人,性功能障礙愛按怎按怎!差天甲地,予你捎無寮仔門。        2016.11.6寅

人真巧,有當時仔人嘛真戇。親像臭面做好一件工課的人,做甲流汗,閣予(hông)嫌甲流瀾,只因為臭面使人討厭;親像面對別人的言行,家己無佮意就隨受氣,現場氣氛隨變質。世間人,無人欲予臭面、予受氣,是按怎gâu臭面的人,一臭臭一世人?gâu受氣的人,嘛便無佮意就欲受氣呢?
2016.11.5

這个世間,真正的公平是無公平。散凶人違規駛車車禍,俗俗仔判賠,予伊納會起;好額人違規駛車車禍,就愛重判賠償款,以免伊產生錢了人無代的觀念,橫直恁爸有錢,因此無甲挵死人當做一回事。                                                                                                                        2016.11.2

中國賣油郎黜破神箭手的雞胿仔(ke-kui-á)啟示人,無啥物好囂俳(Hiau-pai)的,因為你下較濟時間佇你囂俳的事項裡。所以練成九九神功,嘛無啥物好囂俳的。問題是,為啥物人人選擇拍拚的項目無仝?為啥物嘛有人好親像無想欲拍拚半項?除了天公伯仔,可能無人有才調回應。     2016.10.31

學習生活化,學習才有可能成功。地支將一工分12的時辰,我常捎袂清楚!這站日子,我寫「我的人生我的了悟」,專工寫落完成的時辰。此時此刻,我已經有才調真緊講出,啥物時陣是啥物時辰矣。以此推論,學無的主因,是因為你面對所學無生活化,你才會感覺家己飯桶飯桶。唉,你誤會你家己囉!                                                                                                                     2016.10.30

人咧講東的問題,你就(tio̍h)就(tsiū)東的問題參人討論;人咧講你某一件代誌處理了䆀(bái),你就就人講你彼件代誌,認真思考就好,千萬毋通言起講你的人,當時按怎又閣按怎,按呢才袂牽牽葛葛一大拖,永遠花袂清楚。                                                                      2016.10.29辰時2刻   

人慣勢徛某一个角度,評價別人,就算彼个角度的資訊是偏差的,嘛攏不管,因為按呢,人才有法度應付這个五花十色的人的世界。                                                                2016.10.28戌時3刻6分

弱勢優先?侵占、剝削優勢者的資源和機會,來送予扶袂起抑是歹扶起的弱勢族群的政策,敢著?無機車道的四線道邊仔,有輪椅路和老人步道,這種設施敢著?                      2016.10.25辰時4分


世間事,錢會當解決的代誌,攏是小代誌;合理化、欺騙家己,才會支持家己去做一件明知毋著閣干干也欲去做的代誌。                                                                                2016.10.24申時5刻8分

講事實,無情緒,無生話,將經過踮腦海中重踅一擺,你會發現真相,揣著解決問題的智慧,因為事實就是神。                                                                                              2016.10.23辰時3刻

電腦時代的現代人,畏接接(tsih-tsiap)人,無法度對別人彼面鏡照清楚、看清楚家己,這是這个時代的悲劇。                                                                                                             2016.10.22午時3刻

思想本身真媠,思想化作行動愈媠,思想生出深入的思想猶閣較媠。         2016.10.22午時2刻4分

世間事,好好䆀䆀,好中有䆀,䆀中有好。廣島因為原子彈爆炸,接受身體檢查的照顧,變成長歲壽的日本人中,第一長歲壽的區域;籃球界,球藝毋是一粒一的林書豪,佇普遍看無起亞洲人的美國,才有機會產生「林來瘋」現象。                                                                     2016.10.21酉時5刻

一个袂愛振動、大魚大肉、薰酒無離喙的人講,遐的勸我運動健身、食食(tsia̍h-si̍t)養生者的公祭,我參加過矣,這號話是這个世間上蓋諷刺的代誌。                                           2016.10.21卯時1刻

支持別人去做一件神聖的代誌,無代表家己就會一點仔都無考慮就會去做,因為可能損害家己的利益、金錢、被威脅抑是性命危險,致使家己躊躇再三,甚至逃避閃開。       2016.10.19戌時5刻

無袂使的時,人就被控制、被奴隸矣。親像食毒的無毒,食薰的、跋筊的、啉酒的、tshit迌的、蹔舞廳的、peh山的、讀冊的、做研究的--------一工無做就袂使,人就失去自由矣。非自由人的人生,毋是淒慘落魄,就是飛黃奢颺(tshia-iānn)。                                                     2016.10.17卯時2刻

敢食囡仔時代毋敢食的物件,叫做大漢;追求食物、事物的原汁原味,叫做成熟。2016.10.15戌時二刻


天敵以外,所有的動物攏是平靜的,快樂的。人來矣,驚惶、痛苦、傷亡、絕種、大絕種,相紲相紲一直發生一一一寫佇怪手來矣,鱔魚、白節仔和草仔萬的四跤仔,颺颺傱,毋知欲傱佗位去以後。(絕種,古早音tse̍h-tsíng)(白節仔=雨傘節)                                                               2016.10.15寅時五刻

別人是鏡。有頭殼的人,看清楚鏡中的家己,嘛知影隨時修正家己。   2016.10.14辰時六刻

人啊,你愛了解你家己,這句話是每一个人這世人上重要的課題。             2016.10.13寅中

附件 20161028_092907.jpg (232.37 KB)2016-10-29 01:19 PM

20161028_094608.jpg (238 KB)2016-10-29 01:19 PM

20161028_101142.jpg (229.01 KB)2016-10-29 01:19 PM

20161028_104347.jpg (229.22 KB)2016-10-29 01:19 PM


[ 本文章最後由 巫火爐 於 2016-12-12 06:14 AM 編輯 ]
附件: 您所在的用戶組無法下載或查看附件

TOP

TOP

謝謝校長招待!

TOP

回覆 3樓 恆愛台 的文章

攏總是豬腳、

TOP

回覆 3樓 恆愛台兄 的文章

無看你翕相,竟然有相片................

小case,盡地主之誼,是該然啊!

後擺來,請你食無相款的。

TOP

回覆 4樓 鐵骨銅牙 兄的文章

用鐵骨銅牙 食豬跤上好

連骨頭都哺哺吞吞落去,絕對無貨底,無潘(phun)!

哈哈,鐵骨銅牙這个筆名,讚啦!

TOP

感謝校長好料招待~下回來高雄換我招待!

引用:
原文章由 巫火爐 於 2016-10-29 08:17 PM 發表
無看你翕相,竟然有相片................

小case,盡地主之誼,是該然啊!

後擺來,請你食無相款的。

TOP

引用:
原文章由 恆愛台 於 2016-10-29 08:26 PM 發表

下回來高雄換我招待!






LET'S DRINK TOGETHER , 

AND ~~~~~

THIS IS MY UNDERSTANDING IN WHOLE LIFE ~~~
JUST REMEMBER THAT 
WHATEVER YOU LOOK LIKE ;
WHEREVER YOU COME FROM;
WHOEVER YOU ARE ;
 HISTORY AND CULTURE , 
KISS MY ASS! 






附件: 您所在的用戶組無法下載或查看附件

TOP