列印

酒よ7

本主題由 恆愛台 於 2016-10-6 11:30 AM 設置高亮
您是本文第403個瀏覽者

酒よ7

佇希臘神話內底,天神宙斯有兩个後生:一个是日頭神阿波羅,另外一个酒神戴奧尼索斯。
日頭神代表的是理性、撙節,親像日頭帶來日暗、春夏秋冬的規律;酒神代表的是本性、欲望、無禁無忌,創造性命的高峰經驗。
文人提這兩種無仝的神來看世間人,因此將人分做日神性格和酒神性格。日神性格的人,照規定來,一步一跤印,真有耐性去完成伊人生的責任和追求;酒神性格的人咧,掠狂追求,就算爽死醉死,只要會當走揣著家己嘛無所謂。

我有一个教授朋友,伊逐暝暗時7點食飽,一大杯結冰的茶水囥踮冊桌,開始讀冊做研究,一直到日頭出來,伊尻川䫌攏無離開伊所坐彼條椅仔,這種人是標準的酒神性格,愛,愛甲死;怨恨,恨甲入骨的人。另外,日神性格的人若準是領導人,嚴厲規定,不准人擔屎偷啉,做伊的部屬又閣是酒神性格,可能就會真艱苦活落去。

好得佳哉,世間人的表現,較少極端的日神性格抑是酒神性格,多數是徛佇兩極之間,目色讚,看時機、範勢,隨時會當調整家己,所以無啥物問題。

我常提日神性格和酒神性格這兩个詞,來看待家己,回想家己的人生。我發覺青少年的我,倚向酒神性格,常出現醉死無要緊的念頭;年紀愈大,尤其當校長以後,愈是傾向日神性格,尤其目前,對自己不利、無益,我就會選擇疏開。

朋友,你咧?你是日神性格彼種人?抑是酒神性格彼種人。

TOP