列印

酒よ3

本主題由 恆愛台 於 2016-9-18 04:38 PM 設置高亮
您是本文第408個瀏覽者

酒よ3

有人講酒是藥。

會記得細漢的時,賣藥仔團來庄裡做戲兼賣藥。有一寡仔藥,in攏講參米酒做伙啉落,一服見效。

敢有影?我毋知。以常識來看,酒會加速血的循環,較緊好,應當是定著的。咱若上網查,各種酒攏有伊的功效,像bih-luh,是液體麵包,有營養熱量以外,啉bih-luh有益動脈硬化、降低白內障、減輕心臟病、防止骨質酥鬆和產生bih-luh眼,一種平時看普通媠普通緣投的變較媠較緣投的現象。

像紅酒,上網一查,講有九大功能:啥物預防心腦血管病、幫助消化增強食欲、美容功效、調節經痛、減肥好睏、預防乳腺癌、預防感冒、滋補營養、對抗高單位糞圾食品等等。

這是網路寫的,講一下仔我親目看的。有一个朋友,爸母、兄弟攏因為肝癌短命(40左右),毋知是毋是這个因素,孤單的伊退伍以後,大量啉bih-luh,差不多是將bih-luh當做飯,薪水嘛大部分開佇bih-luh裡,橐袋仔袋磅子的時,一支空矸仔4箍,規厝間的bih-luh矸仔,提去換bih-luh會當換幾仔打閣過一打彼種程度,數十年無改變,現此時60外仔外,伊人活甲好溜溜,比較無薰無酒,講究生機飲食兼逐工運動,閣無法度抵抗肝癌的人,咱真正無啥物話通講。

會記得我拄教冊,有當時仔3-5好朋友,路邊攤仔窟咧就嗄(sà,大喙食緊)的時,常會䢢著一个80幾歲、阮叫伊阿桐伯的老歲仔,伊嘛足愛啉酒,每改啉至少一罐紹興酒以上,猶袂顛袂醉,面色紅絳絳閣在piak –piak,使在場阮這群少年的擋袂牢比大頭拇共呵咾。

啉酒,真正對身體有好處。上趣味的,鄉裡有一个興啉58仔、每改攏啉足濟的人,決心改酒以後,煞著腸仔胃的重病,蹛入大病院,醫生一檢查解說講,是因為雄雄無啉58仔,腸仔胃的歹菌失去制裁的力量,才會破病。

哈哈,酒よ!是中性的,愛按怎參酒よ鬥陣,每一个人攏有適合你家己的一種方式,愛細膩仔體會感受,酒よ才會是好藥。

[ 本文章最後由 巫火爐 於 2016-9-18 04:21 PM 編輯 ]

TOP